ليه يا عمرى ..
ليه المشاعر من قلوبنا بتختفي ؟
وليه شموع الشوق في ليلنا بتنطفي ؟
وليه إنهارده بتبعدى ؟
مع إن وعدك كان صريح ..
إنك يا عمرى مستحيل ..
هييجي يوم فيه تبعدي ..
لسه فاكرة ..
كنت بستعجل الأيام ..
علشان أشوفك ..
علشان أحس بنور عيونك ..
وبجنوني وبجنونك ..
أيوة بحلف ..
إني بعشق دنيتي علشان وجودك ..
وعلشان ساعات ..
بحس فيها بالحنين ..
لسه فاكرة ؟؟!
أيوة قولي لسه فاكرة ؟
لما كنا قريبين ..
لما كنا حنينين ..
لما كنا بنستقوى ببعضنا ..
من نفسنا ..
من جراحنا من السنين !
.
أيوة عارف ..
أيوة عارف إنه صعب ..
نكون في يوم لبعضنا ..
ونقدر نكمل حلمنا ..
لكن يا عمري ..
يا كل عمري ..
خلينا نسأل نفسنا ..
هي الحياة من غير مشاعر
تبقى إيه ؟!
تبقى عدم .. ولا جراح ..
ولا مسخ ولا ايه؟
وليه بنهرب من مصير ..
عارفين يا عمري إننا ..
مهما أبتعدنا ..
رايحين اليه !