الثلاثاء، 9 فبراير، 2010

البوست ده أنا بكتبه من الموبايل وأنا على فراش المرض المفاجئ وعلشان كده البوست مش منسق معلش سامحونى . الموضوع بمنتهى الوضوح انى كنت نايم فى سابع نومة وباكل رز وفراخ وصينية بطاطس مع الملايكة وفجأة صحيت على وجع و ألم شديد في كتفي الشمال وطبعاً لأني خبرة في المواضيع دى من أيام الأزمة القلبية الأولى والثانية - و اللى كان تأثيرهم عليا زى تأثير الحرب العالمية الأولى والثانية على ألمانيا بخرج منهم محطم لكنى برجع أقوى من الأول والحمد لله - مسكت الموبايل وطلبت الدكتور والراجل الحقيقة رغم انه كان نايم لكنه رد بسرعة غير متوقعة وبصراحة اهتم جدا جدا فوتر خيره. المهم انه طلب منى انى اركب تاكسى وصمم اوى على موضوع تاكسى ده. يعنى يا دكتور مينفعش عربيه ملاكى أو ميكروباص أو حتى توك توك ؟ الراجل صمم وقالى تاكسى يا عمرو ولو عندك عربيه اوعى تسوق تاخد تاكسى وتروح المستشفى حالا وانا هكلم الدكتور الموجود. الحقيقة الوجع كان بدأ يزول الى حد ما لكن انا كنت قلقان ولهجة الدكتور قلقتنى اكتر وعلشان كده بعد 40 دقيقة كنت في المستشفى ولقيتهم منتظريني كأني رئيس دولة هولوماكوبا . دى دولة لسه هيخترعوها. 10 دقائق بالظبط كنت نايم على سرير فى الطوارئ وجهاز رسم القلب جنب السرير والاسلاك على صدرى وايدى ورجلى ولا كأني وقعت في شبكة عنكبوت. الدكتور الموجود صغير في السن وفى الخبرة كمان لكنه طمننى وقالى مفيش حاجه انت بتتدلع ولا ايه ؟ طبعا أنا جاوبت عليه وانا راسم على وشى كل علامات الاستنكار من سؤالة وقلتله .. معقول يا دكتور تفتكر إنى بتدلع ؟؟ أنا طبعا بتدلع .. ممكن أروح بأه ؟ سكت شوية وقالى واللى يتدلع يستحمل اللى هيحصل له . سيادتك هتستنى معانا 24 ساعة تحت الملاحظة . يااااااااااااااااااااااااااه يا دكتورده انا كده هغير عنواني فى البطاقة واكتب مكانه عنوان المستشفى . 3 مرات ادخل المستشفى فى 4 شهور وكام يوم .. كتير أوى ولا إيه رأيك ؟ ياللا مش مهم .. كلها كام ساعة إن شاء الله .. بس إنتوا إدعولى!
ملحوظة مش مهمة خالص .. لو لسه فى عمر وربنا كتبلى أنى اخرج هبقى أعمل تنسيق للبوست و أختارله إسم ويمكن كمان أحط صورة . ايه رأيكم بأه ؟

هناك 28 تعليقًا:

بحر يقول...

ربنا يشفيك يا عمرو والف سلامه عليك ربنا معاك وترجع لينا بالسلامه

someone يقول...

الف الف الف الف مليون سلامه ياحساس يا عمورى
ياسكر
بعد الشر عنك وربنا يحميك ويحفظك لأهلك
ربنا يطمنا عليك
هدعيلك من قلبى

أمانى يقول...

بعد الشر عليك يا عمرو ان شاء الله تقوم بألف سلامة

زهرة الصبار يقول...

سلامة قلبك يا عمرو ربنا يعفى عنك ان شاء الله وربنا يجعلها فى ميزانك ....وأعتقد ان قلبك اتحمل كتير فبينبهك تخف عنه ...استجيب لنداؤه وحاول تزيح عنه أى هموم ...وتنعشه شوية ربنا يعينك ..ويساعدك..
وبعد الشر عنك

حسن يقول...

سلامتك يا عمرو يا رومنسى طبعا قلبك تعب من كمية النكد اللى كنت بتكتبها ارحم نفسك شوية وطمنى عليك او افتح الموبايل علشان اعرف اطمن عليك

غير معرف يقول...

يارب يشفيك
بعد الشر عنك

صديق مخلص يقول...

سلامة قلبك يا جميل يا أبو الإحساس والرومانسيةربنا يشفيك ان شاء الله

سماح يقول...

ربنا يشفيك ان شاء الله

أماني يقول...

ايه يا عمرو انت كده قلقتني . انت كاتب ان الدكتور قال 24 ساعة بس كده فات اكتر من 4 ايام . ياريت تطمننى لانى قلقت عليك اوى.
أختك أمانى عبد الرحمن

Amr Essam يقول...

بحر .. شكراً على تعليقك والحمد لله انا بخير

Amr Essam يقول...

someone
الحمد لله على كل شئ وشكراً على التعليق

Amr Essam يقول...

أماني ...
ألف شكر على إهتمامك

Amr Essam يقول...

زهرة الصبار

شكراً لسؤالك وعلى النصيحة وفعلاً أنا بحاول أنفذها

Amr Essam يقول...

الأخ والصديق حسن
شكراً على سؤالك والتليفون كان مقفول بتعليمات الأطباء.. سامحنى

Amr Essam يقول...

غير معروف

شكراً لدعاءك بالشفاء

Amr Essam يقول...

صديق مخلص

تفتكر يعنى يا حمادة يا روح قلبى أنا مش هعرف أنت مين لما تكتب صديق مخلص ... شكراً على التعليق وعلى المكالمة .. وعندك حق إن الصديق المخلص أندر و أغلى من الماس ..

Amr Essam يقول...

سماح

شكراً ليكٍ والحمد لله على نعمةالشفاء

Amr Essam يقول...

كمان وكمان أمانى عبد الرحمن :-)

يا بنتى انا زى القطط بسبع أرواح .. الحمد لله انا بخير .. كل الموضوع ان الدكاترة والممرضات حبونى اوى .. وخصوصاً الممرضات طبعاً :) فحاولوا انى استمر معاهم لأطول فترة ممكنه.
شكراً على إهتمامك

بحر يقول...

حمدالله على سلمتك ورجوعك لينا بالسلامة وان شاء الله تكون فى احسن حال وخف عن قلبك شويه ارحمه

Amr Essam يقول...

بحر ..

الله يسلمك وشكراً على التعليق الرقيق

Madlin يقول...

best wishs for you

Amr Essam يقول...

Madlin


Thank you dear

Dina يقول...

You know i am reading late, but i knew when u were sick, God is and was with you all the time, you are so nice person and he takes care of you, be sure of this ok (=

Amr Essam يقول...

Dina

yes dear u r right .. and I must thank God all my life for everything ..

Dina يقول...

You and good persons are always in my prayers

Amr Essam يقول...

Dina

thank you dear

regards

Dina يقول...

You are healthy now in name of Allah

زهــــرة بنفســــج يقول...

اولا الف لا بأس عليك
وشفاك الله وعافاك
وانا مش عاوزاك تزعل ربنا بيحبك
لان ربنا لما بيحب عبده المؤمن بيبتليه
فأصبر وارضى ولك الاجر بإذن الله
وألف مليون سلامة عليك
ويااااااارب حسك موجود معانا على طول ولا يحرمنا من تواجدك فيها