الاثنين، ٢ أغسطس ٢٠١٠

إتألمي ..(زجل).


حاسس بجرحك صدقيني ..
وعارف العذاب إللي إنتي فيه ..
لكن كمان .. غدر الزمان ..
الدور عليكي تجربيه ..
بعد الوداع ..
كانت جراحي بتترسم وسط العدم ..
بركان ألم ..
بينفجر بين الضلوع ..
وكانت حماقة قصتي ..
إني إفتكرتك دنيتي ..
وداريت عليكي جوه حضني ..
من الجراح ومن الألم ومن الدموع ..
ملقيتش منك غير وجع وغير جراح ..
وغير أماني بتنكسر ..
في ليل طويل ملهوش صباح ..
وكانت مشاعري بتندهك ..
ورغم القساوة إللي في عيونك ..
كنت لسه بصدقك..
لكن خلاص ..
دلوقتي حلمي ..
مع حد غيرك أكمله ..
وأتأمله ..
وهحس إني بعد منك لسه عايش..
فأبتسم ..
مش بعد منك هنكسر ..
مش بعد منك هنهزم ..
لكن هعيش ..
وهسيبلك إنتى الذكريات ..
تحسي بيها وتحلمي ...
بكلمة حب تنطقها شفايفي ..
تشتاقي ليها وتندمي ..
مش كنتي ياما بتوجعي ؟
الدور عليكي أتألمي !

هناك ١٣ تعليقًا:

وتمضى الايام يقول...

اقل ماتوصف به راااائعة واناسعيدة جدا انك رجعت تكتب بس ماتزعلش منى ليه التناقض ازاى هو حاسس بيها وعارف عذابها وبردة مصر يخليها تتألم هو طبعا واضح انه لقى حدغيرهايكمل معاها الحلم زى مابيقول وخلى اللى عذب يتعذب كلامك كله صح بتمى لك كل السعادة اللى بالدنياودايمامنتظرةقلمك المبدع
تقبل تحياتى

eman يقول...

حلوه جدا وصعب اوى فعلا ان حد يكدب عليك وبرضه تصدقو وهو برضه يستمر فى الكدب حلوه اوى بجد تسلم ايدك وياريت مش تتاخر علينا بكلامك الجميل

eman يقول...

على فكره اختيارك كمان للصوره يجنن الصوره جمده جداا اختياراتك فى الصور دايما موفقه يارب دايما تكون اختيارك كلها صح

غير معرف يقول...

رااااااااائعة ..احساسها صادق ......يمكن أحلى حاجة كتبتها فى المدونة كلها ..ربنا يعينك فى معاناتك ..!
ويقدرك تنسى وتبدأ من جديد ..مع تحياتى

زهرة بريئة يقول...

مش حقدر أقول أكتر من ال علقو قالوه فعلا جامدة قوى ومعبره قوي والاحساس ظاهر وبيوصل للقلب

مدام هناء يقول...

حلوة اوى

أمانى يقول...

حيرتني كما تفعل دائماً. جميلة جدا

أختك أماني عبد الرحمن

Amr Essam يقول...

وتمضى الأيام

أسعدني رأيك ولكننى لا أرى تناقض لأن المقصود هنا أنه يشعر بما تعانيه لأنه قد جربه من قبل ولأنه مر بنفس تلك الفترة العصيبة من قبل .. أنا مؤمن بأن من يكذب اليوم سيكذب عليه غداً .. وأن من يخدع اليوم سيٌخدع غداً .. أسعدني مرورك

Amr Essam يقول...

أيمان

أسعدتينى بكلماتك الرقيقة وبرأيك المهذب سواء عن الكلمات او عن الصورة

Amr Essam يقول...

غير معرف

رأيك أحرجنى للغاية وهو شهادة أعتز بها كثيراً

Amr Essam يقول...

زهرة بريئة

شكراً على تعليقك الرقيق

Amr Essam يقول...

مدام هناء


شكراً جزيلاً :-)

Amr Essam يقول...

أمانى عبد الرحمن

أسعدتنى كلماتك كما تفعلين دائماً :-)