الأحد، ١٧ أكتوبر ٢٠١٠

طوفان .. (زجل).


عايزك جوا أحضانك تخبيني ..
تداريني ..
ومن أحزاني تداويني ..
ده أنا عاشقك ..
وحبي ليكي بعد الحب ..
وبعد الشوق ..
وإذا حبك بيسكرني ..
ف مش عايز في يوم أنا أفوق ..
ولو كانت غمامة بُعد وجعتنا ..
وجرحتنا ..
أكيد الشمس في عيونك ..
هتبعد عننا الضُلمة ..
وييجي شروق ..
لأني خلاص من الأشواق ..
بمشي في الدروب حاير ..
وأنا عالبعد مش قادر ..
وبعدك عني جنني ..
ومين يا حبيبتى غير قلبك ..
ياخدني بشوق يطمنى ..
يطبطب مرة على شوقي ..
ويحضني ..
ف أغمض عيني و أسافر ..
مع عيونك في أشواقك ..
وأداوي جراحي بشفايفك ..
وأحلف إني يا حبيبتي ..
حتى فى حضنك الدافي ..
بيفضل قلبي مشتاقلك ..
وأنا حاير ..
لأن حبي مش عادي ..
ده حبي ليكي زي البحر ..
وأنا بحري ..
كأنه طوفان بموج هادر !

هناك ١١ تعليقًا:

ساسو يقول...

بجد احساسك جميل جدا
وكلماتك في منتهي الرقه
وبجد فرحت جدا بمعرفت مدونتك

تسلم افكارك
وتسلم ايديك

Amr Essam يقول...

ساسو
ميرسى على تعليقك الرائع و مجاملتك الرقيقة .. أسعدني مروركِ للغاية

افروديت يقول...

ايه الكلام الجامد ده انا حاسه انهامن قلبك ياعمرو وحقيقية جدآ..

اكترمن روعه بجد ..

Amr Essam يقول...

أفروديت
حمد الله على السلامة .. يا ترى إتبسطتي في سويسرا ؟؟؟ طبعاً إنتي فاهمة :)
المهم إنك بخير وميرسى جداً على التعليق وطبعاً مبسوط انها عجبتك :)

بحر يقول...

جميل اوي الاحساس ده بس الاجمل انك موجود

Amr Essam يقول...

بحر

شكراً

غادة يقول...

كلمات رائعةوفي غاية الجمال و الرقة
تحمل بين طياتها كم الشوق الهائل للإنسان اللي بتحبه

" انا بشكرك على المدونة الرائعة دي والكلمات الحلوة كتير وبتمنى تقبلني صديقة دائمة هنا " ^_^

Amr Essam يقول...

غادة

اشكركِ على كلماتكِ الرقيقة ويشرفنى تواجدكِ
أسعدنى مروركِ

زهرة بريئة يقول...

رائعة يا عمرو احساسك فيها واضح جدا ورقيق

Amr Essam يقول...

زهرة بريئة .. ميرسى يا فندم وشرفني مرورك جداً :)

Rana Hashem يقول...

وأنا عالبعد مش قادر ..

وبعدك عني جنني ..

ومين يا حبيبتى غير قلبك ..

ياخدني بشوق يطمنى ..

يطبطب مرة على شوقي ..

ويحضني ..

......................
فعلا صعب جدا تلاقى حد يعمل كده لانه بيكون من الملايكة بس اذا ده موجود على الارض تبقى جنه ... جنة ملكتها بايدك يا عمرو
........................
حالاتك سواء خيال او حقيقة
عبارة عن شعاع من الشمس
نور من وسط الظلام
خروج من وراء اسوار الخوف
سلمت دكتور عمرو .....
محبتى من القلب