عايزك جوا أحضانك تخبيني ..
تداريني ..
ومن أحزاني تداويني ..
ده أنا عاشقك ..
وحبي ليكي بعد الحب ..
وبعد الشوق ..
وإذا حبك بيسكرني ..
ف مش عايز في يوم أنا أفوق ..
ولو كانت غمامة بُعد وجعتنا ..
وجرحتنا ..
أكيد الشمس في عيونك ..
هتبعد عننا الضُلمة ..
وييجي شروق ..
لأني خلاص من الأشواق ..
بمشي في الدروب حاير ..
وأنا عالبعد مش قادر ..
وبعدك عني جنني ..
ومين يا حبيبتى غير قلبك ..
ياخدني بشوق يطمنى ..
يطبطب مرة على شوقي ..
ويحضني ..
ف أغمض عيني و أسافر ..
مع عيونك في أشواقك ..
وأداوي جراحي بشفايفك ..
وأحلف إني يا حبيبتي ..
حتى فى حضنك الدافي ..
بيفضل قلبي مشتاقلك ..
وأنا حاير ..
لأن حبي مش عادي ..
ده حبي ليكي زي البحر ..
وأنا بحري ..
كأنه طوفان بموج هادر !
هناك ١١ تعليقًا:
بجد احساسك جميل جدا
وكلماتك في منتهي الرقه
وبجد فرحت جدا بمعرفت مدونتك
تسلم افكارك
وتسلم ايديك
ساسو
ميرسى على تعليقك الرائع و مجاملتك الرقيقة .. أسعدني مروركِ للغاية
ايه الكلام الجامد ده انا حاسه انهامن قلبك ياعمرو وحقيقية جدآ..
اكترمن روعه بجد ..
أفروديت
حمد الله على السلامة .. يا ترى إتبسطتي في سويسرا ؟؟؟ طبعاً إنتي فاهمة :)
المهم إنك بخير وميرسى جداً على التعليق وطبعاً مبسوط انها عجبتك :)
جميل اوي الاحساس ده بس الاجمل انك موجود
بحر
شكراً
كلمات رائعةوفي غاية الجمال و الرقة
تحمل بين طياتها كم الشوق الهائل للإنسان اللي بتحبه
" انا بشكرك على المدونة الرائعة دي والكلمات الحلوة كتير وبتمنى تقبلني صديقة دائمة هنا " ^_^
غادة
اشكركِ على كلماتكِ الرقيقة ويشرفنى تواجدكِ
أسعدنى مروركِ
رائعة يا عمرو احساسك فيها واضح جدا ورقيق
زهرة بريئة .. ميرسى يا فندم وشرفني مرورك جداً :)
وأنا عالبعد مش قادر ..
وبعدك عني جنني ..
ومين يا حبيبتى غير قلبك ..
ياخدني بشوق يطمنى ..
يطبطب مرة على شوقي ..
ويحضني ..
......................
فعلا صعب جدا تلاقى حد يعمل كده لانه بيكون من الملايكة بس اذا ده موجود على الارض تبقى جنه ... جنة ملكتها بايدك يا عمرو
........................
حالاتك سواء خيال او حقيقة
عبارة عن شعاع من الشمس
نور من وسط الظلام
خروج من وراء اسوار الخوف
سلمت دكتور عمرو .....
محبتى من القلب
إرسال تعليق