الأربعاء، 8 ديسمبر، 2010

حالة ..(زجل).


جاية بكل وقاحة تقولي ..
أيوة خلاص قررت أنساك ..
وأنا ندمانة على قصتنا ..
على حكايتنا ..
وعلى أحلام شفتها في هواك ..
جايز فاكرة إنى ف بُعدك ..
ممكن أقاسي ..
أو هتعذب .. ولا هموت ..
لازم تفهمي إنك كنتِ ..
مجرد غلطة ..
وليلة من عمري وبتفوت ..
لكن أنا في حياتِك حالة
أنا كنت ليكي كل حاجة ..
أنا خدت منك كل حاجة ..
أنا كنت أحلامك ف ليلك ..
كنت أرضِك .. كنت شطِّك ..
كنت نيلك ..
و إنتِ كنتِ أي حاجه.
أنا بظلمِك ؟
جايز أكون بظلم ضلوعي ..
لو يوم كمان تتحمِّلك ..
جايز أكون بظلم عيوني ..
لو نظرة واحدة تبصِّلك ..
جايز أكون بظلم إيديا ..
لو يوم تفكر تلمسك ..
جايز أكون بظلم كياني .
لو كنت شايف فيكي حاجه ..
أو إني شايفك كنتِ حالة ..
طيب قولي بتبكي ليه ؟
إوعي تقولي إنك بتحسي ..
أو بتحبي ..
أو بتعاني لأني بعيد ..
بصي لنفسك ..
جوه مرايتك ..
غيري فستان حكايتك ..
وإلبسي فستان جديد ..
إفتحي باب من بيبانك ..
ودخَّلي راجل جديد ..
قوليله نفس الكلمتين ..
غنيله ياللا غنوتك ..
وخليه يحس بإنه وحده دنيتك ..
خليه يقول إنه خلاص إتملكك ..
وخليه يحس بإنه حاله ..
وخليه يحس بإنه وحده من البشر ..
إللي إمتلك كل الحياة ..
خليه يشوفك دنيته ..
وخليه يحس بإن أرضك سكِّته ..
خليه يلاقي بين ضلوعك خطوته ..
خليه يحس بإن حضنك منتهاه ..
خليه يحس بإنه حاله ..
لكن أنا هفضل لوحدى دنيتك ..
وهتيجي بكره تحلفي ..
إن الحياة من غير وجودي .. إستحالة!

هناك 10 تعليقات:

Dr/ walaa salah يقول...

كلام جميل اوي يا عمر بس قاسي اوي

بس يمكن في ناس كتير تستاهل الكلام ده من جراحهم للناس اللي بيحبوهم

مشكور يا عمر وفي إنتظار جديدك

زهرة بريئة يقول...

رهيييييييييييييييبة يا عمرو
أنا عيطت والله
رهيبة فعلا

غير معرف يقول...

ليه القسوة دى ؟

Amr Essam يقول...

د. ولاء
بدايةً أشكركِ على متابعتكِ المستمرة و تعليقاتك الدائمة ..
أتذكرين نظرية الفعل ورد الفعل ؟
ربما كانت قسوة الكلمات هنا مجرد رد فعل على فعل قاسي .. وإن كانت ليست بالضرورة أن تمثل تجربة شخصية . .. فربما كانت مجرد فكرة خطرت ببالي فى ليلة شتاء باردة .. على كل حال إن كنتِ ترين كلماتي قاسية فلعل القسوة بالكلمات يا صديقتي أكثر رحمة من القسوة بالأفعال .. تشرفت للغاية بمروركِ الرقيق.

Amr Essam يقول...

زهرة بريئة

أعتذر وبشدة عن إثارة شجونكِ.

Amr Essam يقول...

غير معرف ..

وما هى القسوة ؟ هل قسوة من خان وهجر وعذب أم هى قسوة الكلمات؟
أسعدني مرورك

افروديت يقول...

أنت ثائر هنا ؟!

ياتري تستحق كل الكلام ده

أكيد ...!

لأن اللي بيحب حد بجد مش هيقبل يظلمه

تحياتي ليك ياشاعر الرومانسيه الحزينه

Amr Essam يقول...

أفروديت

ثائر ؟؟
ربما وأنا أكتب كلماتي تلك كنت قد تعديت حدود الثورة بمراحل عديدة .. على كل حال سعيد بتواجدكِ الذى يسعدني دائماً
تشرفت للغاية بمروركِ

غير معرف يقول...

بصراحة يا عمرو الحياة بتستمر فهى لا تقف على رحيل رجل أو امرأة بيكون فية مرارة للفراق بس أعتقد بيخف المرارة بمرور الأيام
شكرا عمرو
فايزة

Amr Essam يقول...

فايزة

اجل .. تمضى الحياة بلا توقف .. مهما فقدنا .. مهما خسرنا ..
تشرفت للغاية بمروركِ الرقيق