بعدك هعيش (زجل)

فاكرة لما حلمنا يوم ..

إن الحياة هتكون حياة ..

وإن الأماني المخنوقين ..

جوه القلوب ..

وفوق الجباه ..

ترجع تعيش ..

بين الضلوع ..

وتقدر تعيش ..

من غير دموع ..

وتِفضل تعيش ..

رغم المرارة على اللسان ..

ورغم المهانة والخضوع ..

وفاكرة لما الحلم طال ..

زي الجبال ..

وعرفتي يومها إني أنا ..

معنى الرجولة في الرجال ..

وإني أنا حلمك ..

وهمسك ..

وإبتسامة شوق ..

بتنطق بالمحال ..

ليه بعد كل الحلم ده ..

بنعيش سراب ؟؟

وليه قصور الشوق ..

جوه القلوب ..

بتتحول خراب ؟؟

وليه الحنين ..

في عيون سنين ..

متجرحين ..

بيكون عذاب ؟؟

هو إنتِ فاكرة ..

إني أنا بعدك مفيش ؟؟

ولا إنتِ فاكرة إني أنا ..

لو ضعتي مني ألف مرة ..

مش هعيش ؟؟

خليكي عارفة إني أنا ..

بعدك هعيش ..

أيوة هعيش !!